Буюк Британиядаги ҳарбий базалар россиялик агентлар кириши мумкинлиги ҳақида огоҳлантирилди

Буюк Британия мудофаа вазирлиги Россиянинг Биринчи канали журналисти 77-бригада қароргоҳи яқинида пайқалганидан сўнг мамлакатдаги барча ҳарбий базаларга огоҳлантирув жўнатди. Бу ҳақда Daily Mail хабар бермоқда.

Газетанинг ёзишича, 21 ноябрь куни Биринчи канал журналисти Тимур Сиразиев ва оператор Дмитрий Волков ҳарбий база кузатув камералари ёзувига тушиб қолган. Волков машинанинг йўловчи ўриндиғида ўтирган ҳолда суратга олиш билан машғул бўлган.
Мудофаа вазири Гэвин Уильямсонга воқеа бўйича суриштирув ишлари бошланганлиги маълум қилинган. 

Ҳарбий базаларга жўнатилган огоҳлантирув хатида Сиразиевнинг пресс-картаси ва у бошқарган Toyota Avensis автомобили сурати акс этган. Огоҳлантирув хатида журналист база ҳудудига киришга уринганлиги таъкидланган.

Букингем университетидаги хавфсизлик ва разведка тадқиқотлари маркази директори, профессор Энтони Глиснинг айтишича, у журналистлар гуруҳи жосуслик фаолияти билан шуғулланаётганига шубҳа қилмайди.

Огоҳлантирувдан бир кун аввал Биринчи каналда Сиразиевнинг 77-бригада ҳақидаги лавҳаси эфирга узатилган. Лавҳада бригада «троллар фабрикаси» деб аталган ва сохта хабарлар тарқатишда айбланган.