Ғазаб, нафрат ва рашк аёлни жиноят кўчасига бошлади

Бу кўҳна дунёда инсон мудом икки йўл орасида яшайди. Булардан бири — эзгулик бўлса, иккинчиси ёвузлик йўлидир. Одам боласи ҳеч қачон онадан жиноятчи бўлиб туғилмайди. Аммо баъзида нотўғри берилган таълим-тарбия, айрим ҳолларда эса, нопок кимсалар сабабли ёмонлик кўчасига кириб қолади.

Жиноят ишлари бў­йича Тошкент вилоят судида муд­ҳиш қотилликка қўл урган аёлга нисбатан ҳукм ўқилди. Жиноят тафсилотлари билан танишар эканмиз, аёлнинг шундай мудҳиш қилмишга қўл урганини кўриб, қалбимиз ларзага келди...

Тақдир шу экан, Мавжуда (исм-фамилиялар ўзгартирилган) биринчи турмушидан эрта айрилиб, ёлғиз қолди. Якка-ю ягона қизини ҳам она, ҳам ота бўлиб вояга етказди. Тўй қи­либ узатди, набиралик ҳам бўл­­ди. Аммо ҳаётий тажрибага эга, ким ях­ши-ю, ким ёмонлигини ажрата оладиган бу аёл бир олғир кимсани деб тўғри йўлдан адашди.

2012 йилнинг куз ойларида Мавжуда Олим исмли йигит билан танишиб қолади.

Бир йиллик салом-алик, ўзаро хабарлашиб туришлар охир-оқибат изсиз кетмайди, улар шаръий никоҳдан ўтишади ва бирга яшай бошлашади.

Олим табиатан олғир, текин даромад деса, ўзини томдан ташлайдиганлар тоифасидан эди. У Мавжуда билан тижорат мақсадларида фойдаланиб, мўмайгина маблағни қўлга киритиш мақсадида танишган экан. Буёғини сўрасангиз, Мавжуда унга ўзининг бутун меҳрини беради, доимо кўнглига қа­раб яшайди. У пойтахтнинг «Қу­рувчи» мавзесидаги 3 хонали уйини сотиб, бироз арзон нархда «Спутник» мавзесидан 2 хонали уй олади. Ўртадаги фарқ — 10 миллион сўмни эса, Олимга ҳадя қилади.

Дарвоқе, Олим ҳақида. У турмуш ўртоғи Насиба билан бирга яшамаса-да, лекин қо­нуний никоҳи бекор қилинмаган, икки нафар фарзанди бор. Болалари ва хотинини ташлаб қўйган бу кимса бошқа бир аёлни бахтли қила олмаслиги аниқ эди.

Худди шундай бўлди ҳам. Моддий манфаатдорликни кўз­лаб қурилган «турмуш» орадан беш йил ўтиб, барбод бўла бошлайди. 2017 йилнинг май ойида Мавжуда Олимнинг бегона аёл билан муносабати борлигини сезиб қолади. У турмуш ўртоғининг уйга кеч келиши, қўл телефонини эса бекитиб ёнида олиб юришидан қаттиқ шубҳаланади.

Бир куни у Олимга сездирмасдан телефонини кавлаштираётиб, бегона аёл билан ишқий ёзишмаларини ўқиб қолади. Бундан жаҳли чиққан Мавжуда ўша аёлнинг исми Нигина эканини аниқлайди. Олим эса ўзини оқлаш учун турли баҳоналар топиб, сувдан қуруқ чиқади.

Бироқ тез орада Олимнинг яна ўрганган кўнгил ўртанса қўймас қабилида иш тутаётгани маълум бўлади. Ғазаб, алам ва нафрат ўтида қоврилаётган аёл қандай йўл тутишини билмай қолади: «Букрини гўр тузатади» дейишгани рост экан-да.

«Энди нима қиламан? Нимасига учди унинг? Қандай қилиб бўлса-да, муносабатларини тўхтатишим керак!.."

Мавжуда ўйлай-ўйлай, Нигина билан очиқчасига гаплашиб олмоқчи бўлди.

«Яхшилаб қўрқитсам, ўзи кетиб қо­лади», деган фикрда унга қўн­ғироқ қилади.

Аёлга Олимнинг хотини эканини, уни тинч қўйишини, агар муносабатларини тўх­татмаса, уйига бориб, қўни-қўшнилари олдида шарманда қилишини айтади.

Мавжуданинг дўқ-пўписаларидан чўчиган Нигина Олимни ортиқ безовта қилмасликка ваъда беради.

Лекин оз фурсатда Мавжуда икки «ошиқ-маъшуқ» яна топишиб олганини сезиб қолади.

Ўзини ал­данган ва хўрлангандек ҳис қилган аёл қалбини нафрат эгаллаб, миясига ёмон фикрлар кела бошлайди.

Маълумот олиш учун эрининг телефонини яширинча олиб, ундаги SMS хабарларни ўқи­са, нотаниш рақамдан ишқий номалар бор экан. Билсаки, яна ўша Нигинадан келибди. Бундан қаттиқ таъсирланган аёл жиддий чора кў­ришга қарор қилади. Косметолог бўлиб ишлашини билгач, Нигинага қўнғироқ қилади-да, ўзини мижозларидан бири, деб таништиради. Мавжуда суҳбатлаша туриб, косметолог хизматини кўрсатиш учун Нигинани уйига таклиф қилади. Қўшни аёлларга ҳам хизмат кўрсатса, яхшигина пул ишлаб олишини айтиб, қизиқтиради. Нигина ҳам ро­зи бўлади.

Кейин улар Мавжуданинг Қуйи Чирчиқ туманидаги уйи­га келишади. Йўлда Нигинанинг телефонига кимдир қўн­ғироқ қилади. Мавжуда: «Эрингизми?», деб сўраганида, у: «Мени иккинчи хотин қилиб олган, ўзи милицияда ишлайди, 6 йилдан бери танишмиз», дейди.

Бу гаплардан Мавжуданинг нафрати янада кучаяди. Уйга келгач, ошхонага кириб, Нигинага ўзининг кимлигини, Олимни тинч қўймаётгани учун ҳар куни уйида жанжал бўлаётганини айтади. Довдираб қолган Нигина айбини бўйнига олмайди. Мавжуда эса эрининг телефонидаги SMS хабарларни сўзма-сўз айтиб беради.

Иқрор бўлишдан бошқа чораси қолмаган Нигина ҳам бўш келмасди. Ўзини оқлашга уринаётган Нигинанинг бу безбетлигидан ғазабланган Мавжуда унинг юзига сирка кислотасини сепиб юборади. Нигина қўли билан юзини чан­галлаб қолади ва Мавжуданинг сочига ёпишади.

Қарасаки, Нигина – ўзидан бақувватроқ. Шунда стол устида турган пичоқни олиб, бир неча марта аёлга санчиб олади. Ке­йин эса аллақачон ҳаётдан кўз юмган Нигинанинг жасадини ертўлага олиб тушиб яширади. Шовқин-суронни эшитган қўш­нилари «Нима бўлди, тинчликми?», деб чиқиб қолишади. Мавжуда эса уйига ўғри тушганини айтиб, жиноятини яширади. Шундан сўнг у Нигинанинг жасадини ертўлада узоқ вақт сақлаб бўл­маслигини англайди.

Ўйлай-ўйлай чорасини топади. У ўткир болтани олиб, жа­садни 9 бўлакка бўлади ва елим қопга жойлайди-да, уйи­дан 400 метр узоқликдаги Чирчиқ дарёсига ташлаб юборади.

Аввалига содир этилган жиноятни ҳеч ким пайқамайди. Мавжуда қилган ишидан қаттиқ пушаймон бўлади. Ам­мо тез орада тарқалган шов-шув, қи­дир-қидирлардан калаванинг учи Олимга келиб тақалади.

Мавжуданинг кўз ўнгида ҳу­қуқни муҳофаза қилувчи идора ходимлари Олимдан Нигина ҳақида сўраб-суриштириб, уни Мавжуда билан бирга туман ички ишлар бўлимига олиб кетишади. Ниҳоят, жиноят иши очилиб, ҳақиқий айбдор қилмишини бўйнига олди.

Бундай даҳшатли воқеага хулоса ёзиш ҳам ниҳоятда оғир.

Ғазаб, нафрат, рашк, ҳатто ёши­ бир жойга борган аёлни ҳам мудҳиш жиноятга қўл уришдан қайтмайдиган ман­қуртга айлантириб қўйди. Хал­қимиз­да «Тенг тенги билан­...», де­ган мақол бежиз айтилмаган. Агар Мавжуда ҳам шу ҳақида ўйлаб кўрганида эди, бундай кўйга тушмаган бўларди.

Афсуски, энди кеч, вақтни ҳам, бахтни ҳам асло ортга қайтариб бўлмайди.

Дилшод ТОЖИБОЕВ,
жиноят ишлари бўйича
Тошкент вилояти судининг раиси