Афғонистонда президент сайлови ўтказиш муддати уч ойга кечиктирилади

Афғонистон мустақил сайлов комиссияси 20 апрелда бўлиб ўтиши мўлжалланган президент сайлови муддатини уч ойга ортга суради. Бу ҳақда сайлов комиссиясидаги манбасига асосланиб 1TVnews телеканали хабар берди. 

Хабар қилинишича, сайлов кечиктирилгани ҳақида 27 декабрь куни расман эълон қилинади.

Манбанинг сўзларига кўра, сайловнинг кечиктирилиши сайлов тузилмаларини шакллантириш ишлари билан боғлиқ. Бундан ташқари, кечиктириш “Толибон” ҳаракати вакиллари билан тинчлик келишуви бўйича музокаралар ўтказишга тайёргарлик ортида юз бермоқда.

Аввалроқ БМТнинг Афғонистон бўйича миссияси вакили Тоби Ланзер ташкилот сайловнинг эҳтимолий ортга сурилишига қаршилик қилмаслигини билдирганди.