Ўзбекистонда хусусий суд экспертизаси ташкил этилади

Фото: Global Look Press

Ўзбекистон Президенти "Суд-эксперт фаолиятини такомиллаштириш чора-тадбирлари тўғрисида"ги қарорни имзолади. Ҳужжатга мувофиқ энди Ўзбекистонда нодавлат суд экспертизаси ташкилотини яратишга рухсат этилади. Уларга 44 турдаги суд экспертизасини ўтказиш ҳуқуқи берилади.

Нодавлат суд-эксперт ташкилотларининг экспертлари тўлов асосида қайта тайёрлаш ва малака ошириш курсларида ўқишади. Курс якунларига кўра улар суд эксперти сертификатини қўлга киритишади, мазкур сертификат уларнинг профессионал компетентлик талабларига мувофиқлиги ва тегишли мутахассислик бўйича малакага эга эканликларини тасдиқлайди.

Суд эксперти сертификатларини олган шахслар ҳақидаги маълумотлар Адлия вазирлиги сайтига жойлаштирилади.

Нодавлат ташкилотлар экспертизалари хулосалари давлат ташкилотлар хулосасига тенглаштирилади.

Нодавлат эксперт ташкилотининг экспертиза хулосасидан норози кишилар суд экспертизасини ўтказиш учун такроран давлат суд-эксперт муассасасига мурожаат қилишлари мумкин.

Суд-эксперт фаолияти мувофиқлаштируви Адлия вазирлиги зиммасига юклатилди.