АҚШ Россияни ЖСТ қоидаларини бузганликда гумонламоқда

Фото: Reuters/Scanpix

АҚШ Россия Жаҳон савдо ташкилоти (ЖСТ)нинг нормаларини бузиши мумкин, деб ҳисоблайди. Бу ҳақда РИА «Новости» АҚШнинг ташкилотдаги савдо вакили ҳисоботига таянган ҳолда хабар бермоқда.

Ҳисобот муаллифларининг таъкидлашича, агар Россия томонидан бузилиш юз бергани аниқланса, унда зарур «чоралар» кўрилади.

«[Қўшма Штатлар] муаммони ҳал қилиш ва Россия бозорларини АҚШдан экспорт учун очиқ қолдириш мақсадида барча зарур чораларни ўрганиб чиқади ва амалда қўллайди», - дейилади ҳужжатда.

Шунингдек, ҳисобот муаллифлари Россиянинг мамлакатга товарлар олиб кириш ва олиб чиқиш бўйича нормаларини танқид остига олишди. Хусусан, улар Россияда ишлаб чиқаришни маҳаллийлаштириш ва айрим солиқ ҳамда йиғимлар борасида салбий фикр билдирганлар.

Эслатиб ўтамиз, аввалроқ Венесуэла ЖСТга АҚШ устидан шикоят қилганди.

#Россия #АҚШ #ЖСТ