«Реал» Ла Лига 29-турида «Уэска»ни қабул қилиб, 3:2 ҳисобида ғалаба қозонди. Ушбу баҳсда мезбонлар дарвозасини бош мураббий Зинедин Зиданнинг 20 ёшли ўғли Лука қўриқлади. Бу кичик Зидан учун «Реал» таркибидаги иккинчи расмий ўйин, «Сантьяго Бернабеу» стадионидаги дебют учрашув бўлди.
«Қаймоқранглилар» бош мураббийи ўйиндан кейинги матбуот анжуманида ўғлини таркибга киритиш қарорига қуйидагича изоҳ берди.
«Лука учинчи дарвозабонимиз саналади. Куртуа ўйинга тушишга тайёр эмасди. Кейлорни танлашимиз мумкин эди, аммо миллий жамоасидан қайтгач, унга дам беришга қарор қилдик. Мен Лукани у менинг ўғлим бўлгани учун эмас, балки у ҳам қолганлар қатори «Реал» аъзоси эканлиги сабаб таркибга киритдим. Унинг ўйини ҳақида ота сифатида гапирмоқчи эмасман, чунки мен «Реал» мураббийиман. Фақат шуни айта оламанки, Лука энди ёш бола эмас, унда ҳам характер бор, у ҳам майдонга чиқишни хоҳлайди», – деди Зидан.
El Chiringuito`нинг келтиришича, франциялик мутахассиснинг жамоа ўйини тўғрисидаги фикрлари қуйидагича бўлган:
«Биринчи голни хато туфайли ўтказиб юбордик. Умуман олганда эса ўйинни яхши ўтказдик. Доимо ғалаба қозонишга ҳаракат қиламиз. Марианони таркибга киритганимиз туфайли айрим ўзгаришлар қилишимиз керак эди. Бу ўз самарасини берди.
Бензема 10 йилдан буён «Реал»да ўйнаяпти. Эҳтимол, бу мавсум унинг учун энг яхшисидир. Мен Каримга ишонч билан қараяпман. У клубимиз аъзоси ва у қандай ўзгаришга қўл урмоқчи, деб ўйламайман».
