Туркияга НАТО ёки С-400дан бирини танлаш таклиф қилинди   

АҚШ вице-президенти Майкл Пенс Туркия НАТОда аъзолик қилиш ёки Россиянинг С-400 зенит-ракета тизимларидан бирини танлаши кераклигини айтди.

Пенс Туркия “тарихдаги энг муваффақиятли ҳарбий альянсдаги “ўта муҳим” шериклик ёки бу шериклик хавфсизлигига таҳдид солувчи “ақлсиз қарорлар” ўртасида танлов қилиши лозимлигини айтган. Унинг таъкидлашича, С-400нинг харид қилиниши НАТОга катта хавф солади.

Аввалроқ АҚШ С-400 сабабли Туркияга F-35 қирувчи самолётлари учун қурилмани етказиб беришни бекор қилганди. АҚШ ва НАТОнинг бошқа давлатлари Туркияда қуролланишда ҳам С-400, ҳам F-35 турса, Россия тизими радарлари АҚШ қирувчиларини аниқлаб, улар ортидан кузатув олиб боришни “ўрганиб олиши”дан хавотир билдирган.

Анқарага С-400нинг 4 та дивизионини етказиб бериш ҳақидаги келишувга 2017 йил сентябрда эришилган.