Трамп Хитойнинг яна 300 млрд долларлик маҳсулотларига бож киритишни буюрди

АҚШ президенти Дональд Трамп Хитойнинг яна 300 млрд долларлик маҳсулотларига бож киритиш ҳақида топшириқ берди. Бу ҳақда Америка савдо вакили Роберт Лайтхайзерга таяниб Reuters ва Bloomberg хабар берди.  

Лайтхайзер ушбу жараён ҳақида батафсил маълумот бермаган. Янги божлар ҳақида якуний қарор ҳозирча қабул қилинмаган.

Унинг билдиришича, қайси маҳсулотларга нисбатан бож жорий этилиши ҳақидаги маълумот душанба, 13 май куни АҚШ савдо ваколатхонаси сайтига жойлаштирилади.

Бу ушбу ҳафтада Трампнинг АҚШга импорт қилинадиган Хитой маҳсулотларига нисбатан бож киритиш ҳақидаги иккинчи баёнотидир. У аввалроқ, Хитой билан савдо музокаралари арафасида ҳам ана шундай баёнот берганди.