Мбаппе «ПСЖ»дан кетиши мумкинлигига ишора қилди

«ПСЖ» ҳужумчиси Килиан Мбаппе Франция футболчилар касаба уюшмасидаги тақдирлаш маросими вақтида шу ёзда клубини ўзгартириши мумкинлигига шаъма қилди.

19 май куни 20 ёшли футболчи Франциянинг энг яхши футболчиси ва мавсумнинг энг яхши ёш футболчиси учун таъсис этилган совринларини қабул қилиб олди.

«Мен учун катта шараф. Мавсумнинг энг яхши ўйинчиси – менга етишмаётган ягона соврин эди. Мен ҳақиқатдан ҳам жуда хурсандман.

Аввало, мен бу совринни Носир ал-Ҳелайфига («ПСЖ» президенти – Tribuna.uz) бағишлаган бўлардим. Ундан жуда ҳам миннатдорман, клубга келган биринчи кунимданоқ у доимо мен билан самимий муносабатда.

Шу ерда бўлиб турган барчани, чемпионат ташкилотчиларига ҳам раҳмат айтмоқчиман. Тўрт йилдан бери биринчи дивизионда ўйнаяпман. Бу ерда кўплаб ҳис-ҳаяжонли воқеаларни бошдан кечирдим.

Биринчи навбатда «Монако», бу жамоада чемпионлик бўлишни уддалагандик. Кейин мутлақо бошқа лойиҳа – «ПСЖ»га ўтдим ва тез орада жамоага мослашиб кета олдим. Албатта, баъзи дилхираликлар ҳам бўлди, бироқ бу ҳам футболнинг бир қисми. Биз Франция чемпионатида ғолиб чиқдик ва буни компенсация деб аташ мумкин.

Яна бир бор жамоадошларимга, мураббий ва клубга миннатдорчилик изҳор этмоқчиман. Ҳозир ҳаётимнинг жуда муҳим палласи. Менимча, фаолиятимдаги биринчи ёки иккинчи бурилиш нуқтасига яқинлашяпман.

Ўйлайманки, бу ерда кўп нарсаларни ўргандим ва энди, балки, масъулиятни елкамга оладиган пайт келганини ҳис қиляпман. Умид қиламанки, бу «ПСЖ»да бўлади ва бундан фақат хурсанд бўламан. Ёки, эҳтимол, бу бошқа жойда, янги бир янги лойиҳада бўлар», – деган Мбаппенинг сўзларини келтирмоқда L’Equipe.