Дунёдаги энг узун йўловчи самолёт синови 2020 йилгача қолдирилди – двигателда нуқсон аниқланган

Boeing авиасозлик компанияси ўзининг янги ҳаво лайнерининг синов парвозларини номаълум муддатга қолдирди. Boeing-777X самолётининг илк синов парвози 2020 йил бошигача қолдирилган. Бунга двигателни ишлаб чиқишдаги муаммолар сабаб қилиб кўрсатилмоқда. Бу ҳақда компания сайтида эълон қилинди. 

Янги самолёт билан боғлиқ муаммолар ҳақида ўтган ойда Reuters агентлиги хабар қилган эди. Унга кўра, 777X модели учун махсус ишлаб чиқилган двигателни синаш чоғида нуқсон аниқланган эди. 

Даставвал, кенг фюзеляжли дунёнинг энг узун йўловчи самолёти бўлиши кутилган 777X парвози 2019 йил кузига белгиланганди. Илк буюртмалар 2020 йилда мижозларга етказиб берилиши кутилаётган эди.