Данияда Трампга Гренландияни сотиб олиш ўрнига Аляскани сотиш таклиф қилинди

Дания монархлари спикери Лене Баллебю Дональд Трампнинг Данияга ташрифи қолдирилишини “кутилмаган ҳолат” деб атади.

“Бу кутилмаган ҳолат бўлди. Бизда бу масала бўйича бошқа гап йўқ”, деб айтган Баллебю.

Аввалроқ Трамп Дания бош вазирининг Гренландия сотилмаслиги ҳақидаги гапларидан кейин Данияга сафарини кейинга қолдирганди.

Бир қатор даниялик сиёсатчилар Трампнинг Гренландияни сотиб олиш ҳақидаги гапларидан кейин унинг ташрифини умуман бекор қилиш керак, деб ҳисоблашмоқда. Улар Трампга Дания ҳудудларини сотиб олиш ўрнига АҚШ таркибига XIX асрда кирган Аляска яриморолини сотишни таклиф қилишган.

Маълум қилинишича, Трамп Гренландияни йилига 600 млн доллардан ижарага олишга тайёр бўлган. 

Таъкидланишича, Трамп Дания бош вазири Метте Фредриксен Гренландия сотилмаслигини қандай йўсинда гапирганидан норозилик билдирган. 

“Бу рад этишнинг чиройли усули бўлмади”, деб айтган Трамп.

Трампнинг айтишича, Фредриксен Гренландиянинг сотиб олиниши режасини “бемаъни” деб атаб “ёқимсиз” йўл тутган. АҚШ президентининг фикрича, Дания бош вазири унинг таклифига шунчаки рад жавобини берса ҳам бўларди. 

Шу сабабли, Трамп Данияга сентябрь бошига белгиланган сафарини бекор қилишга қарор қилган.