Ҳонгконг полицияси намойишчиларни тарқатиш учун илк бор сувпуркагичлар қўллади

Ҳонгконг полицияси 25 август кечки пайт шаҳарнинг қитъадаги қисмида жойлашган Цуен Ван туманида намойишчилар гуруҳини тарқатиш учун илк бор сувпуркагичли махсус машиналар қўллади. Бу ҳақда маҳаллий телевидение хабар берди.

Тартибсизликлар ҳудудига 15 та сув отувчи замбараги бўлган 2 та Mercedes-Benz юк машинаси етказилган. Улардан бири йўлнинг қатнов қисмида намойишчилар томонидан қурилган баррикадаларни олиб ташлаш учун кучли сув оқими ота бошлаган. 

Намойишчилар бунга жавобан ғиштлар ва ёнувчи аралашмали бутилкалар улоқтиришган. Охир-оқибат полиция йўлни тозалаб, намойишчиларни орқага чекинтиришга муваффақ бўлган. 

Шу билан бирга янги техника бевосита намойишчиларга қарши тўлиқ куч билан қўлланмаган.

Ҳонгконгдаги жорий намойишлар собиқ британ мустамлакасининг Хитойга 1997 йилда қўшилгандан кейин энг катта кўламлиси ҳисобланади.

2018 йил Ҳонгконг маъмурияти томонидан махсус буюртма билан 2 млн долларга 3 та сув отувчи Mercedes-Benz юк машинаси сотиб олинган. Ҳар бир машина 24 тонна оғирликка эга бўлиб, 15 та сувотгич билан жиҳозланган. Улар, шунингдек, кейинчалик тартибсизликлар иштирокчиларини аниқлаш учун ювилмайдиган бўёқ ҳам ота олади. Айни вақтда Ҳонгконгда ушбу машиналардан 2 таси навбатчиликда туради. 

25 августда намойишчиларнинг бир қисми ҳокимият билан келишилган йўналишдан чиқиб, тартибсизликлар бошлаган. Полиция намойишчиларга қарши кўзни ёшлатувчи газ қўллаган, аммо намойишчилар қаршилик кўрсатган.