Ҳонгконгдан Ўзбекистонга янги ҳаво йўналиши очилиши мумкин

Ўзбекистон ва Ҳонгконг ўртасида тўғридан тўғри авиақатновни йўлга қўйиш бўйича музокаралар давом этмоқда. Туризм қўмитаси раиси Абдулазиз Оққулов яқин ойларда бу борада ижобий янгиликлар бўлиши мумкинлигини маълум қилди.

Ҳонгконгнинг етакчи оммавий ахборот воситаларидан бири бўлган Now.com нашри Ўзбекистон ва Ҳонгконг ўртасидаги туризм алоқаларига бағишланган материал эълон қилди. Унда Туризм қўмитаси раиси Абдулазиз Оққуловнинг эксклюзив интервьюси ҳам ўрин олган.

Интервьюда таъкидланишича, томонлар Ҳонгконг ва Тошкент ўртасида янги ҳаво қатновини йўлга қўйиш имкониятларини муҳокама қилмоқда. Шунингдек, Ҳонгконгдан Бангкок орқали Ўзбекистонга авиайўналиш очиш масаласи ҳам кўриб чиқилмоқда.

Абдулазиз Оққуловнинг маълум қилишича, Ўзбекистон ўтган йили 11,7 миллион сайёҳни қабул қилган бўлиб, 2030 йилга бориб бу кўрсаткични 20 миллион нафарга етказиш мақсад қилинган.

Нашрда қайд этилишича, Марказий Осиёдаги энг кўп аҳолига эга мамлакат саналган Ўзбекистон кейинги йилларда иқтисодий ўсиш суръатларини қарийб 6 фоиз даражасида сақлаб келмоқда. Мамлакат нафақат сайёҳларни, балки хорижий инвесторларни ҳам фаол жалб этишга интилаётгани таъкидланган.

Бунинг учун меҳмонхона ва туризм соҳасига сармоя киритаётган инвесторларга қатор имтиёзлар тақдим этилмоқда. Жумладан, тўрт юлдузли меҳмонхоналар учун ҳар бир хонага 5 минг доллар, уч юлдузли меҳмонхоналар учун эса 3,5 минг доллар миқдорида субсидия ажратилади. Шунингдек, меҳмонхона фойдаланишга топширилгандан кейин етти йилгача солиқ имтиёзлари берилади.

Материалда Ҳонгконг фуқаролари учун Ўзбекистоннинг виза тартиблари ҳақида ҳам маълумот берилган. Унга кўра, Ҳонгконг фуқаролари Ўзбекистонда 10 кунгача визасиз, электрон виза орқали эса 30 кунгача бўлишлари мумкин. Зарур ҳолларда электрон виза муддатини онлайн тарзда узайтириш имконияти ҳам мавжуд.