«Бу ажойиб инсонлар яшайдиган буюк давлат» — Трамп Польшани фожиали сана билан табриклади

АҚШ президенти Дональд Трамп Польшани фожиали сана – Иккинчи жаҳон уруши бошланишининг 80 йиллиги билан табриклади. Бу ҳақда Newsweek нашри хабар берди. 

Трамп Польшада Иккинчи жаҳон уруши бошланишининг 80 йиллигига бағишланган тадбирларда иштирок этиши керак эди, бироқ охирги лаҳзада «Дориан» довули туфайли сафарини бекор қилган. Журналистлардан бири АҚШ президентидан «Польшага ушбу фожиали сана билан боғлиқ бирор нарса айтмоқчимисиз?» деб сўраганда, ўзининг ўрнига тадбирларга вице-президент Майк Пенс боришини назарда тутиб, бу давлат учун «ажойиб хабар» борлигини айтган. 

«Ҳозирча эса Польшани шунчаки табрикламоқчиман. Бу ажойиб инсонлар яшайдиган буюк давлат. Бизнинг давлатда поляклар кўп – 8 млнга яқин бўлса керак. Биз польшалик дўстларимизни яхши кўрамиз», деб айтган Трамп.

Аввалроқ Трамп довул яқинлашаётгани важи остида Польшага сафарини бекор қилган, бироқ бунинг ўрнига гольф-клубига жўнаган.