Эронда нидерландиялик футболчининг рафиқаси ўйин вақтида стадиондан чиқариб юборилди

Эрон миллий чемпионатидан ўрин олган “Гол Гохар Сиржон” ва “Сайпа” клублари ўртасидаги ўйинда нидерландиялик футболчи Кевин Янсеннинг рафиқаси стадиондан чиқариб юборилди. Бу ҳақда Газета.ru нашри хабар берди. 

Воқеа Эрон чемпионатининг 2-турида юз берган. Янсеннинг клуби “Гол Гохар Сиржон” “Сайпа”ни қабул қилган. Футболчининг рафиқаси учрашувни кузатгани ва турмуш ўртоғини қўллаб-қувватлагани стадионга келган.

Бироқ танаффус вақтида стадион ходими маҳаллий урф-одатларга ишора қилиб, аёлдан стадионни тарк этишини талаб қилган. Жумладан, стадион ходими аёлларга турли спорт тадбирларини томоша қилиш учун стадионларга бориш тақиқланганини айтган.

Футболчининг рафиқаси стадионни тарк этгач, учрашувни майдон яқинидаги офис ойнасидан томоша қилган.

Янсен Эрон клубига жорий ёзда Нидерландиянинг “Камбура” клубидан эркин агент сифатида ўтган. “Сайпа”га қарши ўйин футболчининг янги клуби учун илк учрашуви бўлган.