Давлат органларининг ишонч телефонларига қўнғироқларни бепул амалга ошириш таклиф этилди

“Менинг фикрим” жамоавий мурожаатлар порталида давлат органларининг ишонч телефонларига қўнғироқларни бепул амалга ошириш ҳақида петиция эълон қилинди.

Қайд этилишича, Ўзбекистон Республикасидаги вазирликлар, идоралар, маҳаллий ҳокимликларнинг ишонч телефонларига симли ва мобиль телефон орқали қўнғироқлар амалга оширилганда абонент ҳисобидан тўлов ечиб олинади. 

Шунингдек, ишонч телефонларига фуқаролар томонидан кўплаб қўнғироқлар қилинганлиги сабабли жуда кўп вақт давомида кутишга тўғри келаётгани айтилади. Бу кутиш вақтида ҳам ҳисобдан маблағнинг сарфланишига олиб келиши билдирилган.

“Юқоридагиларни инобатга олиб, барча давлат органлари ва ташкилотлари, шунингдек маҳаллий ҳокимликларнинг ишонч телефонларига симли ва мобиль телефонлар орқали қўнғироқларни бепул амалга оширилишини таклиф қиламан”, - деб ёзади мурожаат муаллифи.