Идишда қадоқланган ичимлик сувининг хавфсизлиги тўғрисидаги умумий техник регламент тасдиқланди

Вазирлар Маҳкамасининг “Идишда қадоқланган ичимлик сувининг хавфсизлиги тўғрисидаги умумий техник регламентни тасдиқлаш ҳақида”ги қарори қабул қилинди.

Ҳужжат “Техник жиҳатдан тартибга солиш тўғрисида“ги Ўзбекистон Республикаси Қонунига мувофиқ, шунингдек, идишда қадоқланган ичимлик сувининг хавфсизлигига қўйиладиган ягона талабларни белгилаш мақсадида қабул қилинган.

Идишда қадоқланган ичимлик сувининг хавфсизлиги тўғрисидаги умумий техник регламент ва уни жорий этиш схемаси тасдиқланди.

Идишда қадоқланган ичимлик сувининг хавфсизлиги тўғрисидаги умумий техник регламент расмий эълон қилинган кундан бошлаб ўн саккиз ой ўтгач амалга киритилади.

“Техник жиҳатдан тартибга солиш тўғрисида”ги Ўзбекистон Республикаси Қонуни талабларига мувофиқ техник регламентлар амалга киритилиши муносабати билан уларда кўрсатилган маҳсулотлар ва хизматларни стандартлаштириш бўйича илгари қабул қилинган норматив ҳужжатлар мажбурийлик хусусиятини йўқотиши ва белгиланган тартибда қўлланилишида ихтиёрийлик касб этади.

“Ўзстандарт” агентлиги давлат ваколатли органлари билан биргаликда ушбу қарор билан тасдиқланган Умумий техник регламент амалга киритилган кундан бошлаб идишда қадоқланган ичимлик сувини стандартлаштириш бўйича норматив ҳужжатларни қўллашда уларнинг мажбурийлик хусусиятини бекор қилиш ва ихтиёрийлигини таъминлаш юзасидан белгиланган тартибда чора-тадбирлар кўради.

“Ўзбекозиқовқатхолдинг” ХК, “Ўзстандарт” агентлиги Ўзбекистон миллий телерадиокомпанияси билан биргаликда Идишда қадоқланган ичимлик сувининг хавфсизлиги тўғрисидаги умумий техник регламентнинг мақсадлари, мазмуни ва уни қўллаш тартиби тўғрисида аҳоли, давлат ва хўжалик бошқаруви органлари, тадбиркорлик фаолияти субъектларининг кенг хабардор қилинишини таъминлайдилар.