ИИББ: Ўзбекистон - Саудия Арабистони ўйинида жамоат тартиби бузилиши билан боғлиқ ҳолатлар қайд этилмади

Кеча, 14 ноябрь куни, Тошкентдаги “Пахтакор” стадионида Жаҳон чемпионати-2022 саралаш босқичи доирасида Ўзбекистон ва Саудия Арабистони терма жамоалари ўртасида футбол ўйини бўлиб ўтди. 

ИИББ хабарига кўра, ўйинга билдирилган катта қизиқиш сабабли, 14 ноябрь кунига қадар 18.000 та чипта сотилган бўлса, ўйин куни соат 17.15 гача умумий 29.000 та чипта ўз эгаларига тарқатилган. Футбол ишқибозларига қулайлик яратиш мақсадида чипталар сотуви 31 октябрь кунидан iTicket.uz сайти орқали ҳам амалга оширилди. Натижада 30 минг кишига мўлжалланган стадионга қарийб 40 мингта томошабин ташриф буюрган. 

Қайд этилишича, кўпчилик чипта харид қилиш ниятида стадионга ўйин бошланишига ярим соат қолганда келган. Чипталарни илгарироқ харид қилган томошабинларнинг баъзилари учрашув бошланиш арафасида келган бўлса, баъзилар кечроқ етиб келишди. Барча чипталик ва чиптасизлар стадионга кириш дарвозаларидан ўрнатилган назорат пунктлари атрофида тўпланишган. Натижада чиптасизлар ва кеч қолганлар соат 17.30 да тартибсизликни юзага келтиришган. Айнан чиптасизлар тиқилинч оқибатида стадионга кириб олиш мақсадида тартибсизликка сабаб бўлишган. Ҳуқуқни муҳофаза қилувчи органларнинг навбатда туриб чиптани тақдим қилиш ҳақидаги илтимосларига жаҳл қилганлар четга олиниб, чиптаси бўлган, аммо кеч қолган футбол ишқибозлари киритилдилар. 

Режа бўйича бу каби катта спорт тадбирлари давомида жамоат тартибини сақлаш ва фуқароларнинг хавфсизлигини таъминлаш учун ППХ, отли отряд, кинологлар ҳамда Миллий гвардия ходимлари жалб қилинар эди. Тошкент шаҳар ИИББ ва Ўзбекистон Республикаси Миллий гвардия ходимлари жамоат тартибини сақлаган ҳолда, чиптасиз келган кишиларга ҳамда чиптага эга бўлган, аммо текширувни четлаб ўтмоқчи бўлган фуқароларга бу каби тадбирларга кириш қоидаларини ва сумкаларни текшириш зарурлигини тушунтиришган. Тошкент шаҳар ИИББ бошлиғи тадбир давомида жамоат тартибини сақлашга ва фуқароларнинг хавфсизлигини таъминлашга жалб қилинган бутун шахсий таркибга ўз миннатдорчилигини билдирган.

“Алоҳида қайд этиш жоизки, жамоамиз мағлубияти томошабинларни ранжитган бўлишига қарамасдан, ҳеч ким тартибни бузилишига сабаб бўлмади. Натижада тадбир ҳодисаларсиз якун топди.

Ўтган тадбир натижаларига кўра қайд этилган камчиликларни инобатга олган ҳолда, Тошкент шаҳар ИИББ томонидан ташкилотчиларга тегишли таклифлар киритилади.

Ҳурматли фуқаролар! Юқоридаги каби тадбирларга чипталарни илгарироқ харид қилишингизни ва тадбир ўтказиладиган жойга беш дақиқа қолганда эмас, илгарироқ келишингизни илтимос қиламиз”, - дейилади маълумотда.