Абдураҳмон Фозилов ва Отабек Жўраев чипта сотуви билан боғлиқ ҳолатга қўшимча изоҳ берди

Абдураҳмон Фозилов ўзига нисбатан танқидий чиқишлар қилган блогерлар билан учрашиб, вазиятга ойдинлик киритганини маълум қилди. Унинг сўзларига кўра, учрашувда фан-клубнинг Америкага келиши ва ташкилий ишлар, чипталар билан боғлиқ ҳолатлар, шунингдек, футболка сотувларига алоқадор эмаслигини аниқ далиллар билан кўрсатиб берган. Отабек Жўраев ҳам фан-клуб чипталарига умуман дахли бўлмагани, фақат визаси чиқмай қолган мухлисларга чипталарини сотишга ёрдам берганини таъкидлади.

Ижтимоий тармоқлардаги чипта сотуви билан боғлиқ танқидларга Iwash бренди билан танилган Отабек Жўраев қўшимча изоҳ берди. У фан-клуб чипталарига умуман алоқаси бўлмагани, фақат визаси чиқмай қолган мухлисларнинг чипталарини бошқаларга сотишга ёрдам берганини таъкидлаяпти.

“Ўзбекистондан Америкага бориб, 5 та чипта сотганман. 20 минг доллар харажат қилиб, 2-3 минг доллар топаман деб бордим. Мантиққа тўғри келадими? Яхшилаб ўйлаб кўринглар.

Биринчидан, стадион ташқарисида қолиб кетган “бечоралар”дан бошлаймиз. 2-3 нафар ўзбекистонлик сунъий равишда чипта нархини ошириб юбораркан-да? Конголиклар ташқарида нима қилаётганди? Уларга ҳам ўзбеклар билет сотганми, шунда? Стадионга 71 минг нафар одам кетаркан. 68 минг нафар мухлис билан деярли тўлди. Ҳамма билади, чипта қанча кам қолган сари, нарх-наво шунча кўтарилиб кетади. Бу табиий. Америкада, очиқ бозор иқтисодиётида яшаб, шуни билмадингларми?

Иккинчидан, сизлар меҳмон, биз мезбон деяпсизлар. Худдики, биз Америкаларингни олиб қўядигандай. Хўп, сизлар нимага шу ерда бўла туриб олдиндан чипта сотиб олмагансизлар? Йилнинг бошидан бери ФИФАнинг расмий сайтида турганди. Бизлар Ўзбекистондан туриб чиптани олганмиз.

Учинчидан, чипта сотишга келадиган бўлсак, ўзларинг менга чипта борми, деб алоқага чиқдиларинг. Кўчада йўқ эканми, чипта? Менам кўчада чипта сотиб юрганим йўқ эди. Сизларнинг ишларингни енгил қилган бўлсам, мен айбдор бўламанми? Визаси чиқмаганлар менга алоқага чиқиб, чиптасини сотиб беришимни сўради. Бошқа томондан чипта керак дейишди. Менам ўртада ёрдам берибман. Ўзимникини ҳам қўшиб сотиб юборибман. Охирига келганда ўғлимга ҳам билет топа олмай қолдим. Битта акамиз Тошкентдан алоқага чиқди, чиптамни совға қилиб юбораман деб. Майдалашадиган бўлсам, уни ҳам исботини кўрсатиб бераман. Бешта чипта сотганман, 68 минг одам кирган стадионга. Қанақа қилиб нархни сунъий равишда ошириб юборган бўлишим мумкин. Мингта сотган тақдиримда ҳам бозорга таъсир ўтказа олмайман. Фан-клуб чипталарига-ку умуман алоқам йўқ. Мен бу жойда ўтирганим ҳам йўқ. Фан-клуб чипталарини Америкада туриб ҳам олса бўларди. Чиптани бепул берсангиз бўлмайдими, деб қўйишади. Мен нимага бепул беришим керак? Бу хайрия тадбирими? Бу футбол. Пулга олинади. Кап-катта эркакларга мен нимага бепул беришим керак?

Американинг ўзида ўзбекларимизнинг чипта сотуви бўйича алоҳида гуруҳлари бор экан. Шулардан ортиб менга телефон қилибсизлар, демак уларда қимматда. Арзон ҳам сотган бўлиб қоляпманми?

Футболка масаласига келадиган бўлсак, менинг умаман алоқам йўқ. Бепул ҳам тарқатишди, кўрдинглар. Пуллиларига келадиган бўлсак, расмий сайтда 33 долларга турибди. Шуни 40 доллардан 70 долларгача сотишди. Бу уларнинг иши, ўзининг пулига олган”, дейди Отабек Жўраев.

Абдураҳмон Фозилов ҳам вазият бўйича қўшимча изоҳ берди ва ўзаро тушунмовчиликлар барҳам топганлигини маълум қилди.

Ижтимоий тармоқларда бир қатор чиқишлар қилган Икромжон Абдуллаев ва Фозилов ўзаро учрашиб, вазиятга ойдинлик киритган. Учрашувда Фозилов фан-клубнинг Америкага келиши ва ташкилий ишлар, чипталар билан боғлиқ ҳолатлар, шунингдек, футболка сотувларига алоқадор эмаслигини аниқ далиллар билан кўрсатиб берганини таъкидлаяпти.