Испанияда ичида уч тонна кокаин бўлган сувости қайиғи юқорига чиқарилди

Испанияда бортида уч тонна кокаин билан ушланган сувости қайиғи бир неча уринишлардан сўнг юқорига чиқарилди ва Альдан шаҳри портига олиб келинди. Бу ҳақда 20 minutos нашри хабар берди.

Аввалроқ Кангас муниципалитетидаги дарёнинг денгизга қуйилиш жойида Жанубий Америкадан келган узунлиги 20 метрли сувости қайиғи аниқланганди. Экпиажнинг икки аъзоси қўлга олинган, яна бири қочишга улгурганди.  

Сувости қайиғи иккита улкан кран ёрдамида сув остидан чиқариб олинди.  

La Voz de Galicia газетасининг ёзишича, у Суринам, Гайана ёки Бразилияда қурилган ва уч ҳафтача аввал Испания томон йўлга чиққан.  

Europa Press агентлигининг маълумот беришича, экипажнинг қўлга олинган аъзолари панжара ортига жўнатилган. Уларга гиёҳвандлик моддаси тарқатиш айблови қўйилган.