Туркия С-400 бўйича санкция киритиладиган бўлса, АҚШ учун Инжирлик базасини ёпишга тайёрлигини билдирди

Агарда Анқара Россиянинг С-400 зенит-ракета тизимларини сотиб олгани учун АҚШ санкция жорий этадиган бўлса, Туркия америкалик ҳарбийлар учун ўзининг Инжирлик авиабазасини ёпиш имкониятини кўриб чиқишга тайёр. Бу ҳақда Туркия ташқи ишлар вазири Мавлут Човушўғлу A Haber телеканали орқали чиқишида маълум қилди.

"Туркия АҚШдан Инжирлик авиабазасидаги ҳарбийларини олиб чиқиб кетишини сўраши мумкин", - дея унинг сўзларидан иқтибос келтирмоқда Sabah газетаси.

Човушўғлунинг сўзларига кўра, Анқара шунингдек, Европа ракетадан мудофаа тизимлари жойлаштирилган "Курежик базасининг ҳам мақомини ўзгартириши мумкин".

Туркия ташқи сиёсат маҳкамаси раҳбари С-400 "мудофаа тизими" эканлигини ва ундан кимгадир ҳужум қилиш учун фойдаланилмаслигини яна бир бор эслатди.