Конгресснинг қуйи палатаси қўмитаси Трампга қарши айбловларни қўллаб-қувватлади 

АҚШ конгресси қуйи палатаси ҳуқуқий қўмитаси АҚШ президенти Дональд Трамп қарши билдирилган иккита айбловни маъқуллади.

Айбловлардан биринчиси ҳокимиятни суиистеъмол қилиш, иккинчиси эса қуйи палатанинг терговига қаршилик кўрсатиш билан боғланган.

Демократ конгрессменларнинг таъкидлашича, Трамп бир қатор мансабдор амалдорларга кўрсатмалар беришни ҳамда конгрессменларга зарур ҳужжатларнинг берилишини тақиқлаган.

Энди айбловлар тўлиқ таркибдаги вакиллар палатасида овозга қўйилади: конгрессменлар Трампга импичмент эълон қилиш-қилмасликни ҳал қилишади.

Бу масала бўйича овоз бериш 18 декабрда ўтиши кутилмоқда. Агар конгрессменлар Трампга қарши айбловларни қўллаб-қувватлашса, унда сенаторлар АҚШ президентини ҳокимиятдан четлатиш масаласини январда кўриб чиқишади. 

Айни вақтда қуйи палатада кўпчилик ўринга демократлар, сенатда эса Трампнинг партиядошлари – Республикачилар партияси эга.