Ittihad Ўзбекистонда иш бошлаш имкониятини кўриб чиқмоқда

Давлат активларини бошқариш агентлигида Бирлашган Араб Амирликларининг Ittihad International Investment LLC инвестицион компанияси билан учрашув ташкил этилди.

Делегация аъзолари Ўзбекистонда сармоядорлар учун кенг имкониятлар мавжудлиги ва Ittihad International Investment LLC компанияси ҳам бу жараёнларда фаол иштирок этиш, бир қатор соҳаларга инвестиция киритиш ниятида эканини билдирди.

Бутун дунёда катта эътибор қаратилаётган чиқиндиларни қайта ишлаш саноати Ўзбекистонда ҳам ривожлантирилиши лозим бўлган тармоқлардан бири экани таъкидланди. Компания давлат хусусий шерикчилик асосида чиқиндиларни қайта ишлаш соҳасида катта тажрибага эга бўлиб, Ўзбекистонда ҳам бу борада иш бошлаш имкониятини кўриб чиқаётганини маълум қилди.

Шунингдек, компания томонидан меҳмонхоналар, ёқилғи қуйиш шохобчалари ва шифохоналарга ҳам алоҳида эътибор қаратилаётгани маълум қилинди. Давлатга қарашли иқтисодий ночор шифохоналарни давлат хусусий шерикчилик асосида замонавий, жаҳон талабларига мос келадиган муассасаларга айлантириш масаласи ҳам кун тартибида экани қайд этилди.