Шанхайдаги Gigafactory ҳафтасига 1000 дона Tesla электромобили ишлаб чиқаради

Фото: Getty Images

Илон Маскнинг Tesla компанияси Хитойда Model 3 электромобилларини ишлаб чиқаришни бошлади. Электромобилларнинг илк харидорлари фабрика ишчилари бўлди. Машинанинг нархи 50 000 долларни ташкил этади, деб хабар берди CNBC.

Tesla ишлаб чиқариш суръатини ҳафтасига 3000тагача етказишни мўлжалламоқда, деб маълум қилди Шанхайдаги фабрика раҳбарияти.

Ҳозирда бутловчи қисмларнинг 30 фоизга яқини Хитойда тайёрланмоқда, аммо 2020 йил ўрталарига келиб бу кўрсаткич 80 фоизга етказилади. Йил охиригача эса Model 3 тўлиқ маҳаллийлаштирилади.

Бу йил компания Хитойда 30 минг донага яқин ушбу моделдаги электромобиль сотган.