Сергели туманида автобус ағдарилиб кетди

Жорий йилнинг 7 февраль куни соат 17:45 атрофида пойтахтнинг Сергели тумани Нилуфар ва Нилуфар-3 тор кўчалари чорраҳасида автобус ва енгил автомобиль иштирокида йўл-транспорт ҳодисаси юз берди. 

“Тошшаҳартрансхизмат” маълумотларига кўра, 12-автобус саройи тасарруфидаги 117-йўналишда қатновчи "Исузу" русумидаги автобус ўз йўналиши бўйича биринчи даражали йўлдан, яъни Нилуфар кўчаси бўйлаб ҳаракатланаётган вақтда, иккинчи даражали йўлдан яъни, Нилуфар 3-тор кўчасидан ҳаракатланиб келаётган “Каптива” русумидаги енгил автомобили автобуснинг чап орқа қисмига берган зарби натижасида автобус ўз мувозанатини йўқотиб, ағдарилган. 

ЙТҲ натижасида икки нафар йўловчи енгил шикастланди ва уларга тез тиббий ёрдам кўрсатилди. Ҳодиса юзасидан ЙҲХБ томонидан тергов-суриштирув ишлари олиб борилмоқда. 

“Ҳурматли ҳайдовчилар! Автомобиль йўлларининг тартибга солинмаган қисмларида йўл ҳаракати қоидаларига риоя қилинг, ҳушёр бўлинг”, - дейилади хабарда.