Ҳиндистонда 3 минг тонна олтин топилгани ҳақидаги хабар рад этилди

Фото: AP Photo / Mike Groll

Ҳиндистоннинг геологик хизмати Уттар-Прадеш штатида 3 минг тоннадан кўпроқ олтин топилгани ҳақида аввал тарқалган хабарни рад этди.

Аввалроқ баъзи ОАВлар Ҳиндистонда мамлакат олтин захирасини бир неча карра кўпайтириши мумкин бўлган олтин кони топилганини маълум қилган.

Бироқ геологик хизматда таъкидланишича, Уттар-Прадешда узоғи билан 160 килограмм олтин топиш мумкин.

Айни вақтда Ҳиндистоннинг олтин захираси 626 тоннани ташкил қилади. Бу борада АҚШ 8133 тонна олтин билан етакчилик қилади.

Агар Уттар-Прадешда олтин кони топилгани ҳақидаги хабар тасдиқланганда, унда Ҳиндистон 3366 тонна олтинга эга Германияни 2-ўриндан пастга тушириб юборган бўларди.