НКМК ишчиси гилам бўлаклари ёрдамида 35 млн сўмлик олтинни ўғирлашга уринди

Тегирмон машинисти таркибида олтин бўлган бўтанани гилам бўлакларига тўйинтириш орқали завод ҳудудидан олиб чиқишга ҳаракат қилган. Гилам бўлакларидан таркибида 19 граммга яқин олтин бўлган маъданли қум аниқланган.

Навоийда заводдан олтин ўғирлаб чиқишга уринган НКМК ишчиси жиноий жазога тортилди. Kun.uz суд ҳужжати билан танишди.

Суд ҳукмига кўра, 36 ёшли Ҳ.О. НКМК Марказий кон бошқармасига қарашли 2-сонли ГМЗ майдалаш цехида тегирмон машинисти вазифасида ишлаган. У 20 март куни таркибида қимматбаҳо металл бўлган бўтанани 2 та гилам бўлагига тўйинтириш орқали олиб чиқиб кетишга уринган. Бироқ унинг бу ҳаракати фош бўлган.

Гилам бўлакларидан таркибида 35 млн сўмлик 18,44 грамм олтин ҳамда 120 минг сўмлик 4 грамм кумуш бўлган 4 кгдан ортиқ маъданли қум аниқланган.

Ҳ.О. айбига иқрор бўлган.

“20 март куни смена асосида ишга келдим ва белгиланган тегирмонлар олдига бордим. 29-сонли тегирмоннинг пастки қуйилиш қувурлари қопқоқларини очиб, у ерга 2 дона гилам бўлагини қўйдим. Смена якунида гилам бўлакларини олиб, целлофан пакетга солдим. Уларни олиб кетаётган вақтимда қаршимдан завод тартибот бўлими ходимлари чиқиб қолди. Уларни кўришим билан қўлимдаги пакетни ён томонга ташладим. Ходимлар менинг ҳаракатларимдан шубҳаланиб, пакетни очиб кўришди. Сўнгра ички ишлар органлари ходимларига хабар беришди”, деган у суддаги кўрсатмасида.

Ҳ.О. оилавий ва моддий шароити оғирлигини, оилада ягона боқувчи эканини айтиб, суддан енгиллик сўраган.

ЖИБ Томди туман судининг ҳукми билан Ҳ.О. Жиноят кодексининг 25,169-моддаси (ўғрилик) 1-қисмида назарда тутилган жиноятни содир этишда айбли деб топилган. Унга БҲМнинг 10 баравари (4 млн 120 минг сўм) миқдорида жарима жазоси тайинланган.