Афғонистонда блокпостга қилинган ҳужум оқибатида беш нафар ҳарбий ҳалок бўлди

Афғонистон шарқидаги Логар вилоятида блокпостга қилинган ҳужум оқибатида беш нафар ҳарбий хизматчи ҳалок бўлди. Бу ҳақда 1TV news телеканали хабар берди.

Телеканалнинг маълумот беришича, ҳужум "Толибон" гуруҳи томонидан амалга оширилган. Аммо толиблар ҳозирча бу вазиятга изоҳ бермади. 

29 февраль куни Қатар пойтахти Доҳада АҚШ ва “Толибон” ҳаракати ўртасида тинчлик келишуви имзоланди. Келишувни АҚШнинг Афғонистон бўйича махсус вакили Залмай Халилзод ҳамда “Толибон” етакчисининг ўринбосари, ҳаракатнинг Қатардаги офиси раҳбари мулла Абдулла Ғани Бародар имзолади.

Тинчлик келишувида 10 март кунигача “Толибон”нинг 5 минг аъзоси озод қилиниши айтилган. “Толибон” ўз навбатида минг кишини озод этади.

Афғонистон президенти Ашраф Ғани беш минг нафар толибни озод қилиш мажбуриятини олмаганини, бу масала "АҚШнинг эмас, Афғонистон ҳукуматининг ваколатига кириши"ни айтди.