Эрдўған мухолиф партия депутатини судга бериб 165 минг доллар товон пули талаб қилмоқда

Туркия президенти Ражаб Тоййиб Эрдўған мухолиф Республика халқ партияси депутати  Энгин Ўзкўчдан 1 млн турк лираси (165 минг доллар) миқдорида товон пули талаб қилиб уни судга берди. Бу ҳақда Туркия президентининг адвокати ўз Twitter аккаунтида ёзди.

Даъво аризасида ёзилишича, депутатнинг сўзлари президентнинг шаънига путур етказади ва "буткул ёлғон" ҳисобланади. 

"Ўртача ақлга эга инсон ҳам бу айбловлар асоссиз ва адолатсиз эканлигини тушуна олади", - дейилади даъво аризасида.

4 март куни Ўзкўч Туркия парламентида Эрдўғанни Суриядаги сиёсати учун танқид қилган. Шундан кейин икки партия депутатлари ўртасида ўзаро муштлашув бошланиб кетган.

Воқеа Ўзкўч Эрдўғаннинг Республика халқ партияси етакчиси Камол Қиличдорўғлуга қўяётган айбловларига жавоб бераётганида юз берган. Туркия президенти Қиличдорўғлуни Идлибдаги вазият кескинлашгани ортида Сурия президенти Башар Асад билан музокараларни бошлаш таклифи учун “сотқин” деб атаган. Ўзкўч ўз навбатида Эрдўғанни ҳалок бўлган турк ҳарбийлари ҳақида гапирганда “калла” (туркчада ўлик одамнинг қўпол аталиши) сўзини қўллаганликда ҳамда сотқинликда айблаган.  

Анқара бош прокуратураси “президентни ҳақоратлагани” учун Ўзкўчга нисбатан иш очган.