Иордания дунёнинг барча мамлакатлари билан авиақатновларни тўхтатди

Иордания коронавирус тарқалишининг олдини олиш учун 17 мартдан бошлаб юк ташувларидан бошқа барча рейслар учун ўз аэропортларини ёпади.

Фото : РИА Новости

Бу ҳақда мамлакат бош вазирининг Twitter саҳифасида хабар қилинди.

"Душанба 16 мартдан бошлаб қатор мамлакатлар билан авиақатновлар тўхтатилади, 17 мартдан бошлаб эса қиролликка ва қиролликдан юк самолётларидан ташқари парвозлар тўхтатилади", - дейилади хабарда.

Бундан ташқари, Иордания ҳукумати бошқа мамлакатлар фуқаролари учун қуруқлик ва денгиз чегараларини ҳам ёпди.

Аввалроқ Бирлашган Араб Амирликлари 17 мартдан бошлаб дипломатик паспорт эгаларидан ташқари барчага виза беришни тўхтатиши маълум қилинганди.

Шунингдек, 14 мартдан бошлаб Туркияга Германия, Испания, Норвегия, Франция, Австрия, Дания, Швеция, Бельгия ва Нидерландия фуқароларининг кириши тақиқланди.

#Иордания #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.