Туркияда коронавирусдан “ҳимояланиш” мақсадида қўлбола спирт истеъмол қилган 15 туркманистонлик ҳалок бўлди

Туркиянинг Истанбул шаҳрида қўлбола спиртдан заҳарланишдан 15 киши ҳаётдан кўз юмди, 60 киши жонлантириш бўлимига тушган. Улар спиртни истеъмол қилиш билан ўзларини коронавирусдан ҳимояламоқчи бўлишган.

Фото: Getty Images

Бу ҳақда Hurriyet нашри хабар берди.

Дастлабки маълумотларга кўра, ҳалок бўлганлар туркманистонликлар бўлиб, улар коронавирусдан ҳимояланиш мақсадида сиртга қўллаш учун қўлбола усулда тайёрланган спирт сотиб олишган. Кейинроқ улар спиртни истеъмол қила бошлашган ва бу улар орасида оммавий заҳарланиш келтириб чиқарган.

Таъкидланишича, спиртни сотишга алоқадор 7 киши қўлга олинган. Воқеа юзасидан тергов олиб борилмоқда.

Шунингдек, айни вақтда туркманистонликлар жасадини ватанларига қайтариш масаласи ҳал қилинмоқда. Вазият коронавирус эпидемияси сабабли Туркия ва Туркманистон ўртасида авиаалоқа тўхтатилгани сабаб мураккаблашган.

Шунга ўхшаш воқеа бир неча кун аввал Эронда ҳам юз берганди. Ўшанда “коронавирусдан дори” сифатида метил спирт қабул қилган 27 киши ҳаётдан кўз юмганди.

Тайёрлаган Шуҳрат Раҳимов

#Туркия #Туркманистон #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.