Россияда карантин режими қатъийлаштирилиши мумкин

Россия ҳукумати мамлакатда карантин режимини қатъийлаштириш ва коронавирусга чалинганлар билан мулоқотда бўлганларни аниқлаш ҳамда изоляция қилиш бўйича чораларни кучайтириши эҳтимоли бор. Бу ҳақда ўз манбасига таяниб РИА Новости хабар берди.

"Россияда инфекция тарқалиш тезлиги Испания, Германия, Франция, Буюк Британиядаги каби кетмоқда. Бу беморлар сонига нисбатан кунига 27 фоиздан 33 фоизгача ўсиш дегани. Коронавирусни жиловлашда муваффақиятга эришган Сингапур, Япония, Жанубий Корея каби давлатлар қаторига қўшилиш учун карантин бўйича кескин чоралар кўриш керак бўлади", - деган агентлик суҳбатдоши.

Унинг сўзларига кўра, Россияда "коронавирусга қарши самарали курашиш учун кескин, лекин зарур чораларни кўришга вақт етарли". 

"Россияда қўшимча чоралар қабул қилишнинг мақсадга мувофиқлигини аниқлаш мақсадида оммавий тест ўтказиш, карантинга жойлаштириш, чегараларни ёпиш, оммавий тадбирларни бекор қилиш, жамоат жойларини ёпиш бўйича халқаро тажриба ўрганилмоқда", - деди агентлик суҳбатдоши.

Аввалроқ Ташқи ишлар вазирлиги Россиядаги ўзбекистонликларни ватанга қайтариш бўйича маълумот берганди.