Тиббий чиқиндилар мисли кўрилмаган даражада кўп ҳосил бўляпти — Нурмат Отабеков

“Айни кунларда тиббий чиқиндилар мисли кўрилмаган даражада кўп ҳосил бўляпти. Ҳеч қачон бу қадар кўп дока ниқоблар, резина қўлқоплар, ҳимоя воситалари ишлатилган эмас. Уларни ишлатиб бўлгандан кейин машиий чиқиндиларга аралаштириш керак эмас. Аввал уларга дезинфекцион ишлов бериш керак. Улар маълум муддат дезинфекция воситаси таъсирида бўлиши керак. Кейингина маиший чиқиндиларга аралаштириш мумкин”, дея Отабековнинг сўзларини келтирмоқда Kun.uz мухбири.

“Аксарият чиқинди ташиш корхоналари кечки пайтда чиқинди олиб кетиш билан шуғулланади. Уларга тиббий чиқиндиларга дезинфекцион ишлов берилганидан сўнг олиб кетилаётганини нафақат тиббиёт муассаса маъмурияти, балки инспектор ва саришталик билан шуғулланаётган соҳа вакиллари назорат қилиши мақсадга мувофиқ”, дея қўшимча қилди у.

Шунингдек, Нурмат Отабеков тиббий қўлқопларни фақатгина бир марта ишлатиш мумкинлигини эслатиб ўтди.

“Тиббиётда ишлатиладиган қўлқоплар бир марта ишлатиш учун мўлжалланган. Уларни ювиб, қайтадан ишлатиш мутлақо мумкин эмас. Ошхонада ва фаррошлик ишларида ишлатиладиган хўжалик қўлқоплари нисбатан қалин ва дағал. Уларни қайнатиш, ювиб, қайта ишлатиш мумкин. Тиббий қўлқоплар учун эса бу усулдан фойдаланиш мумкин эмас”, дея таъкидлади у.

Брифинг давомида бош санитария инспектори коронавирус инфекциясининг мушуклар орқали тарқалиши мумкинлиги ҳақидаги гап-сўзларга изоҳ берди.

“Мушуклар коронавирус тарқатувчиси бўлиши мумкинлиги исботланмаган. Шу боис уларни қириш бўйича ҳеч қандай режа ҳам мавжуд эмас”, деди у.