Россия АҚШга инсонпарварлик ёрдами юборди

Самолёт Нью-Йоркдаги Жон Кеннеди халқаро аэропортига маҳаллий вақт билан соат 16:30 да қўнган (Москва вақти билан 23:30). 30 март куни икки мамлакат президентлари Владимир Путин ҳамда Дональд Трамп телефон орқали гаплашган ва суҳбат давомида Путин ҳамкасбига инсонпарварлик ёрдами таклиф қилган.

Россия президенти матбуот котиби Дмитрий Песковнинг айтишича, Путин ёрдам таклиф қилиш асносида АҚШ томони ҳам керак вақтда ёрдам беришини инобатга олган: «Россия томони оғир эпидемиологик вақтда АҚШга ёрдам таклиф қилди ва жаноб Трамп инсонпарварлик кўринишидаги ёрдамни қабул қилди. Президент АҚШдаги тиббиёт воситалари тайёрлайдиган корхоналар етарлича маҳсулот ишлаб чиқара бошласа, керак вақтда АҚШ ҳам ёрдам бериши мумкинлигини инобатга олди», дейди Песков ОАВ вакиллари билан учрашувда.

Маълумот учун, АҚШда вирус юқтирганлар сони 175 мингдан ошиб кетди, 3 415 киши ҳалок бўлди. Россияда эса коронавирус юқтирганлар сони 2 337 нафарга етди, 17 киши вирусдан вафот этди.