Озарбойжон чегараларини ёпади ва аҳоли ортидан смс-назоратни жорий қилади

Мамлакат расмийларининг маълум қилишича, Озарбойжон чегаралари 5 апрелдан 20 апрелгача ҳаво ва ер транспорти учун ёпиқ бўлади. Бундан юк ташувлари мустасно қилинган.   

Шунингдек, мамлакат ичида авиақатнов ҳам тақиқланади.

Келаси 2 ҳафта ичида аҳолига уч ҳолатда уйдан чиқишига рухсат берилади: тиббий ёрдам олиш учун; озиқ-овқат маҳсулотлари, товарлар, дори-дармон сотиб олиш, банк ёки почтага бориш ва яқин қариндошининг дафн маросимида иштирок этиш учун. 

Уйдан чиқишга рухсат олиш учун фуқаролар белгиланган рақамга смс-хабар жўнатишлари керак бўлади. Шахсий транспортдан фойдаланганда унинг рақамини ҳам кўрсатиш лозим бўлади. 

Фуқаро мурожаатига жавобни бир соат ичида олади ва шундан кейингина уйини тарк эта олади.

Озиқ-овқат маҳсулотлари, дорихона, банк ёки почтага бир кунда бир марта 2 соатга чиқишга рухсат берилади. Шифокор кўригига бориш учун ҳам алоҳида ҳолатлардан ташқари, 2 соатга рухсат берилади.

Кўчага чиқишга рухсат олингани ҳақидаги маълумот электрон ҳукумат ва ҳуқуқ-тартибот идоралари маълумотлар базасига тушади.

Озарбойжон расмийлари карантиннинг бузилиши тегишли, жумладан жиноий жавобгарликка олиб келишидан огоҳлантиришган.

Ҳаракатланишга чекловлар президент маъмурияти, вазирлар маҳкамаси, ташқи ишлар вазирлиги ходимлари, парламент депутатлари, тиббий хизматчилар, ҳаётий таъминот объектлари, ҳуқуқ-тартибот идоралари, оммавий ахборот воситалари ходимлари ва дипломатларга тааллуқли бўлмайди.

24 мартдан Озарбойжонда карантин режими киритилган. 65 ёшдан катталарга уйдан чиқиш тақиқланган, дорихона ва озиқ-овқат дўконларидан ташқари барча савдо объектлари, дам олиш масканлари, ресторанлар ва кафелар ёпилган.

31 мартдан карантин режими кучайтирилиб, одамларга заруратсиз кўчага чиқиш тақиқланган. 

Айни вақтда мамлакатда коронавирусга чалинганлар сони 521 нафарни, вафот этганлар сони 5 нафарни ташкил қилмоқда. 32 киши вирус келтириб чиқарувчи касалликдан соғайиб кетган.