БМТда Трампнинг ЖССТни танқид қилишига жавоб берилди

Жаҳон соғлиқни сақлаш ташкилоти коронавирус пандемиясига қарши курашда улкан ишни қилди. Бу ҳақда БМТ бош котиби расмий вакили Стефан Дюжаррик АҚШ президенти Дональд Трампнинг ЖССТ номига билдирган танқидига шундай изоҳ берди.

Стефан Дюжаррик / Фото: emal Countess/Getty Images

Аввалроқ Трамп асосан АҚШ ҳисобига молиялаштирилувчи ЖССТни Хитойга кўп эътибор қаратишда айблаганди.

“Кўплаб йиллар давомида биз йилига тахминан 58 млн доллар сарфлаб, ЖССТни молиялаштириб келганмиз. Буни тафтиш қилиш вақти келди. Чунки фикримча, улар амалга оширган ҳар бир қадам, улар айтган барчаси нотўғри бўлиб чиқди. Уларнинг барча ишлари Хитойга қўл келган”, деб айтган Трамп.

АҚШ президентининг таъкидлашича, агар у ЖССТнинг Хитой билан чегараларни ёпмаслик тавсиясига қулоқ солганда, “ҳозирда фалокат юз берган бўларди”. “Мен тўғри деб ҳисоблаган ишни қилдим ва бу тўғри қарор бўлди. Бошқа масалалар ҳам бор эди – вирус қаердан келган, унинг кўлами қандай, у қанчалик хавфли. Улар вирусни унча хавфли эмас, деб ҳисоблашган”, деб таъкидлаб ўтган Трамп.

Бу айбловларга жавобан Дюжаррик ЖССТ давлатларга миллионлаб тиббий воситалар етказаётгани, мутахассисларни ўқитаётгани ва амалий йўриқномалар ишлаб чиқаётганини айтган.

“Бош котиб учун мутлақ аёнки, ЖССТ доктор Тедрос Адханом Гебрейесус бошчилигида коронавирус пандемиясига қарши курашда давлатларга миллионлаб воситалар етказиб, мутахассисларни ўқитиб ва йўриқномалар билан таъминлаб улкан ишни амалга оширди”, деб айтган Дюжаррик.

#Дональд Трамп #БМТ #ЖССТ

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.