Пекин метросида «ақлли» поездлар ниқобсиз йўловчиларни аниқлайди

Поездлар вагонлари йўловчиларнинг қиёфасини қайд этадиган ва тасвирни таҳлил қилиш учун интеллектуал тизимга узатадиган кўплаб сенсорли камералар билан жиҳозланган.

Фото: Sonhaber

Пекин метросидаги йўналишлардан бирида тиббий ниқобсиз юрган йўловчиларни аниқлайдиган "ақлли" поездлар юра бошлайди. Бу ҳақда Синьхуа агентлиги хабар бермоқда.

Хабарда айтилишича, янги поездлар Пекин метросининг 6-йўналишида ҳаракатланишни бошлайди. Поездлар вагонлари йўловчиларнинг қиёфасини қайд этадиган ва тасвирни таҳлил қилиш учун интеллектуал тизимга узатадиган кўплаб сенсорли камералар билан жиҳозланган. Тизим ниқобсиз йўловчиларни, ёрдам сўраётган ёки ҳушидан кетган йўловчиларни аниқлайди.

Бундан ташқари, вагонлар эшиклари устига ўрнатилган экранларда 6-йўналишдаги бекатлар ҳамда йўловчилар оқими тўғрисидаги маълумотлар акс этиб туради.

Эслатиб ўтамиз, март ойи ўрталарига келиб, Хитой вирусга қарши курашда ғолиб бўлганини эълон қилганди. Эндиликда мамлакатда касалликка чалинишнинг фақат чет эл билан боғлиқ ҳолатлари қайд этилмоқда.

Тайёрлаган: Дилшод Аскаров

#Хитой #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.