«Гигиена талабларига қатъий риоя қилган ҳолда» — Андижон вилоятида айрим корхоналар фаолияти тикланади

Вилоят раҳбари ҳудуддаги корхона эгаларига иш жойларини гигиена талабларига мос равишда жиҳозлаб, қўрқмасдан фаолиятини давом эттириш кераклиги ҳақида гапирган.

«Тадбиркорлардан илтимос қиламан. Бизда трикотаж маҳсулотлари ишлаб чиқараётган 50-60талик цехларингиз (иш ўринлари назарда тутилмоқда) бор. Сизлар қўрқманг. Биз жойлардаги раҳбарларга топшириқ бердик. Цехингизда иш фаолиятини юргазинг. Иш жойингизга СЭОМ ва соғлиқни сақлаш тизимидан ходимлар ажратиб берамиз. Улар корхона эшиги тагида туриб, кираётган ҳар бир ходимнинг иситмасини ўлчайди, қолаверса гигиена талабларига амал қилган ҳолда иш жойига кириши ва чиқишини назорат қилишади», дейди у.

Вилоят ҳокими тадбиркорларнинг фаолиятига тўсиқ бўлаётган муаммоларни бартараф этишга, хусусан, кредит олиш, солиқ, кредит тўловлари муддатини узайтириш юзасидан уларга кўмак беришга тайёр эканлигини айтиб ўтди.

«Тушунинглар ахир, ҳаммамиз ётиб оладиган бўлсак... қачонгача ётамиз? Қандай қилиб қорин тўйдирамиз? Иқтисодиётимизни нима қиламиз?

Бу дегани ҳаммаёқ бўлди дегани эмас (барча корхоналар ҳам ишлашига рухсат берилмайди). Лекин, яна бир марта айтаман, шундай корхоналаримиз, тадбиркорларимиз бор, 30-50 нафар ишчи ишлатаётган, минглаб одамларни ишлатаётган тадбиркорларимиз бор эди.

Энди карантин экан, деб ёпиб, ётавермасдан, нима масалангиз бўлса, кредит керак бўлса ёки олинган кредитларни қайтариш муддатини чўзиш керак бўлса, солиқлардан имтиёзлар бериш, бунинг учун давлат ва биз томондан қандай ёрдам керак бўлса айтинг. Муҳтарам президентимиз тадбиркорларни карантин пайтида қўллаб-қувватлаш бўйича 2та фармонини чиқарди.

Мен вилоят раҳбари сифатида айтяпман, марҳамат қилиб, корхонангизда гигиена талабларига амал қилган ҳолда фаолиятингизни бошланг. Биз ходим ажратиб, назорат қилиб беришга тайёрмиз. Ҳаёт давом этиши керак. Сабаби, кўп фуқароларимиз бизга мурожаат қиляпти. Биз ишлаётган эдик, ойлик олиб кунимиз ўтаётганди ва иш жойимиз ёпилиб қолди дейишяпти.

Фақат яна бир марта айтяпман, гигиена талабларига риоя қилган ҳолда марҳамат қилиб фаолиятингизни юргизишингиз мумкин», деган вилоят раҳбари.

У мурожаатида умумтаълим мактаби, коллеж ўқувчилари, олий ўқув юртлари талабалари, айниқса, ёши улуғ инсонларни уйда қолишга, китоб ўқишга, фойдали иш билан шуғулланишга, умуман, вилоят аҳолисини агар зарурат бўлмаса, кўчага чиқмасликка, шахсий гигиена қоидаларига қатъий амал қилишга чақирди.

«Лекин, мактаблар, боғчалар, институтлар, коллежлар ишлаши ва 65 ёшдан ўтган фуқароларимиз кўчага чиқиши қатъиян ман этилади. Илтимос қиламан, отажонлар ва онажонлар. Ҳаммангиз уйингизда ўтириб, дуо қилиб, Худодан тилаб, бу бало тезроқ Ўзбекистонимизни тарк этишини сўранглар. Ўқувчи ёшларимиздан илтимос қиламан. Чиқманглар! Уйингизда ўтириб, ўша онлайн дарсингизни ўтинг, уйингизда ўтириб, ота-онагизга томорқасига қарашинг. Уйингиздан чиқманг!

Лекин корхона ташкилотда ишлаётган фуқаролармиз ва тадбиркорларга такрор-такрор айтаман. Иқтисодиёт давом этиши керак. Яна 5-15 кун ўтирамиз деб ҳеч ким кафолат бермайди. Сизни қўллаб-қувватлашга қанақа ёрдам керак бўлса, биз тайёрмиз. Фаолиятингизни ишга тушириб, ўша гигиена талабларига жавоб берадиган тизим қилиб бериш учун, мен вилоят ва штаб раҳбари сифатида ходим ажратиб беришга ва керакли ёрдамларни беришга тайёрман.

Сўзимнинг охирида, Худодан тилаймиз, қадрли андижонликлар, ҳамюртлар, отажонлар, онажонлар, опажонлар, сингилжонлар, акалар ва укалар. Илтимос, келинглар, гигиена талабларига амал қилайлик, ҳар хил йиғин қилмайлик. Қулоғимизга чалиняпти, зерикдик деб кўчага чиқаётганлар ва 4-5 киши тўпланаётганларни эшитяпмиз. Қатъий чора кўришга мажбурмиз. Мажбурмиз.

Ўзингизнинг саломатлигингиз учун, оилангиз, фарзандларингиз учун, юртимизнинг тинчлиги учун амал қилишга ҳаммангиз мажбурсиз», дейди вилоят ҳокими ўз мурожаатида.