Солиқ қўмитасининг жамоатчилик эътирозига сабаб бўлган ҳужжат лойиҳаси муҳокамадан олинди

Давлат солиқ қўмитаси томонидан эълон қилинган жисмоний шахсларнинг пластик карталарига ўтказиладиган пулларни назорат қилишга оид ҳужжат лойиҳаси кенг жамоатчилик эътирозига учраганидан кейин муҳокамалар порталидан ўчириб ташланди.

7 апрель куни Давлат солиқ қўмитаси ва Марказий банкнинг «Ўзбекистон Республикаси Марказий банки ва тижорат банклари томонидан банк ҳисобварақларига оид ахборотларни Давлат солиқ қўмитасига электрон узатиш тартиби тўғрисидаги низомни тасдиқлаш ҳақида»ги қўшма қарори лойиҳаси муҳокамалар порталига жойлаштирилганди. Лойиҳада банклар мижозлари ҳисобварақлари ва  жисмоний шахслар картасига бошқа жисмоний шахс картасидан ўзказмалар устидан назорат қилиши кўзда тутилганди.

9 апрель куни Олий Мажлис Сенати расмий сайтида «Солиқ қўмитаси ва Марказий банкнинг қўшма қарори лойиҳаси қонуний меъёрлар асосида қайта ишлаб чиқилиши лозим» сарлавҳали муносабат эълон қилинган эди.

Унда Давлат солиқ қўмитаси ва Марказий банкнинг regulation.gov.uz веб саҳифасига қўйилиб, кенг мунозараларга сабаб бўлаётган «Ўзбекистон Республикаси Марказий банки ва тижорат банклари томонидан банк ҳисобварақларига оид ахборотларни Давлат солиқ қўмитасига электрон узатиш тартиби тўғрисидаги низомни тасдиқлаш тўғрисида»ги қўшма қарори лойиҳаси танқид остига олинган ҳамда ундаги меъёрлар Солиқ кодексида белгиланган меъёрларга мувофиқ қайта ишлаб чиқилиши лозимлиги таъкидланган эди.

Ушбу танқиддан сўнг Давлат солиқ қўмитаси томонидан Сенатга расмий хат йўлланган. Таъкидланишича, махсус комиссиянинг қарорига мувофиқ ҳужжат лойиҳасини ишлаб чиқиш бўйича топшириқлар ижро муддати икки ойга узайтирилган. Шунингдек, таклифлар ҳамда эътирозлар инобатга олиниб, Низом лойиҳаси веб саҳифадан чиқарилган.

Сенат Давлат солиқ қўмитаси танқид, таклиф ва эътирозларга тўғри муносабатда бўлганини ижобий баҳолаган.

«Албатта, Олий Мажлис Сенати Давлат солиқ қўмитасининг танқид, таклиф ва эътирозларга тўғри муносабатда бўлганлигини ижобий баҳолайди. Шунингдек, мазкур ҳужжат лойиҳаси ва шу каби тадбиркорларнинг ҳуқуқ ҳамда манфаатларига дахлдор барча меъёрий ҳужжатлар доимий назорат остида бўлишини билдиради», дейилади Сенат ахборотида.

Апрель ойи бошида муҳокамага қўйилган ҳужжатда бир ой давомида жисмоний шахсларнинг барча банк карталарига келиб тушган пул маблағлари айланмаси 30 млн. сўмдан (шу жумладан, чет эл валютаси миллий валюта эквивалентида бўлган тақдирда) ва транзакциялари сони 10тадан ошган операциялари тўғрисидаги ахборотларни банклар солиқ идораларига тақдим этиши белгиланганига кенг жамоатчилик, блогерлар, Савдо-саноат палатаси, депутатлар ва иқтисодчилар томонидан эътироз билдирилган эди.