Ўзбекистон олаётган 1 млрд долларлик ташқи қарзнинг дастлабки қисми апрелнинг охирида келиб тушади – Тимур Ишметов

Ўзбекистон молия вазири Тимур Ишметов 15 апрель куни Марказий банкда ўтказилган онлайн брифингда президент фармонига асосан олинаётган 1 млрд доллар миқдоридаги ташқи қарз билан боғлиқ музокараларга тўхталди, деб хабар бермоқда Kun.uz мухбири.

“Инқирозга қарши курашиш учун 10 трлн сўмлик жамғарма тузилган бўлса, бу биринчи қадамлар учун деб айтилган. Агар коронавирус тарқалишининг олдини олиш, одамларимизни ушбу инфекция юқишидан сақлаб қолиш учун яна қанча керак бўлса, шунча харажат қилинади. Шундан келиб чиқиб, бирламчи прогнозларимиздан фарқли равишда бюджет тақчиллиги яна ошиши мумкин. Лекин бу ҳеч қандай хавотирли масала эмас, чунки бизнинг етарли фискал буферларимиз бор. Охирги 3 йилда олиб борилаётган сиёсат эвазига хорижий мамлакатлардан, халқаро молиявий ташкилотлардан арзон қарз ресурсларини ҳам бемалол жалб қилишимиз мумкин.

Бу маблағларни жалб қилишга келадиган бўлсак, 2020 йил 19 мартдаги президент фармонига асосан четдан 1 млрд доллар миқдорида қарз жалб этиш кўзда тутилган бўлиб, бу бўйича барча халқаро молиявий ташкилотлар билан бирламчи музокараларни олиб борганмиз. Бугунги кунда Жаҳон банки 2020 йил давомида 1 млрд доллардан кўпроқ маблағни ажратишга бирламчи розилигини билдирган, шунингдек, Осиё тараққиёт банки ва бошқа бир қатор халқаро молиявий ташкилотлар Ўзбекистонга қарз беришга рози бўлишган. Кутишимиз бўйича, апрель ойининг охирида қарзнинг дастлабки қисми келиб тушади. Май, июнь ва июль ойларида биз мўлжаллаб турган 1 млрд доллар миқдоридаги маблағ келиб тушади”, дея Тимур Ишметовнинг сўзларини келтирмоқда Kun.uz мухбири.

Унинг айтишича, ҳукуматнинг асосий вазифаси одамларни коронавирус инфекциясидан сақлаб қолиш, бунинг учун барча керакли харажатларни таъминлашдан иборат.

“Ҳисоб-китобларимизга кўра, йил бошида бюджет тақчиллиги ялпи ички маҳсулотга нисбатан 2,7 фоиз деб баҳоланган эди, бу жами фиксал тақчиллик. Бу ерда консолидациялашган бюджет тақчиллиги 0,5 фоиз ва ташқи қарз билан боғлиқ харажатлар билан бирга жами 2,7 фоизни ташкил қилиши кутилганди.

Ҳозирги шароитдан келиб чиқиб, янгиланган прогнозларга асосан бюджет тақчиллиги қўшимча 2 фоизга ошиши мумкин. Лекин бу Ўзбекистон учун қандайдир салбий оқибатларга олиб келади деб ўйламаймиз. Кейинги йилнинг ўзида яна барча макроиқтисодий кўрсаткичлар бўйича ижобий натижаларга эришамиз. Чунки ҳозирги пайтда қанчалик қийин бўлмасин, ҳукуматнинг асосий вазифаси одамларни коронавирус инфекциясидан сақлаб қолиш, бунинг учун барча керакли харажатларни таъминлашдан иборат. Бунинг натижасида юзага келган макроиқтисодий кўрсаткичлар билан эса кейинроқ шуғулланилади. Дейлик, тарозининг битта палласида одамларнинг ҳаётини сақлаб қолиш харажатлари, иккинчисида иқтисодий кўрсаткичларни яхшилаш турган бўлса, аввал харажатларни таъминлаб, бунинг иқтисодий оқибатлари билан кейинчалик шуғулланиш мақсадга мувофиқ”, дейди Тимур Ишметов.

Аввалроқ Ўзбекистон бош вазири ўринбосари Жамшид Қўчқоров бугунги кунда ҳар қандай ҳукумат олдида турган муҳим масала ҳақида тўхталиб, бундай шароитда маблағни аяб ўтирмаслик кераклигини таъкидлаган эди. Унинг айтишича, президент одамларнинг бирламчи эҳтиёжларини қондириш бўйича топшириқ берган, ҳукумат турмуш даражаси оғирлашишига қарши барча чораларни кўрмоқда.