Тошкентда қатор автобус йўналишлари қисқартирилади

Тошкентда қатор автобус йўналишлари ҳаракатига ўзгартириш киритиш мўлжалланмоқда. Бу ҳақда “Тошшаҳартрансхизмат” хабар берди.

Қайд этилишича, бу Вазирлар Маҳкамасининг 2020 йил 16 мартдаги “Тошкент шаҳар йўловчи транспорти тизимини такомиллаштириш чора-тадбирлари тўғрисида”ги 157-сонли қарори ижросини таъминлаш ва Тошкент шаҳридаги йўналишлар тармоғини мақбуллаштириш ҳамда йўналишларнинг ўзаро бир-бирини такрорлаб ҳаракатланишини камайтириш мақсадида амалга оширилади.

Транспорт вазирлиги ҳузуридаги Транспорт ва логистикани ривожлантириш муаммоларини ўрганиш маркази, Тошкент шаҳар транспорт бошқармаси ва "Тошшаҳартрансхизмат" АЖ билан биргаликда ишлаб чиқилган таклифлар асосида шаҳар жамоат транспорт йўналишларининг ҳаракатига ўзгартиришлар киритилиши режалаштирилмоқда.