Ўзбекистонда туризмни ривожлантиришнинг янги босқичи “Хавфсиз саёҳат қилинг!” тамойилига асосланади

Бу ҳақда “Тикланиш сари йўл” мавзусида бўлиб ўтган халқаро онлайн-конференцияда маълум қилинди.

Бош вазир ўринбосари Азиз Абдуҳакимовнинг сўзларига кўра, Ўзбекистонда туризмни ривожлантиришнинг янги босқичи “Хавфсиз саёҳат қилинг!” тамойилига асосланади.

Бу ёндошувнинг асосий мақсади – мамлакатда туризм соҳасини қўллаб-қувватлаш ва қайта тиклаш, санитария-гигиена стандартларини яхшилаш ва туризмни ташкил этишнинг янги талабларига мослашиш бўлади.

Бугунги кунда юзага келган инқирозни енгиб ўтиш учун қуйидаги чоралар кўрилади:

* даромад солиғи ва мулк солиғи ставкаларини 2020 йил 31 декабргача 50 фоизга пасайтириш;

* қўшилган қиймат солиғини 10 фоизга камайтириш;

* дезинфекциялаш воситалари ва туризм инфратузилмаси учун контактсиз ускуналар га бож имтиёзлари бериш;

* кўрилган зарарлар миқдорини чекламаган ҳолда 2020 ва 2021 йил якунлари бўйича ўтказиш ҳуқуқини бериш;

* туристик солиқни ҳисоблаш ва тўлашни 2021 йил 1 январгача тўхтатиб туриш;

* жойлаштириш воситалари қурилиши учун илгари берилган ссудалар бўйича асосий қарзни узайтириш (18 ойдан 24 ойгача);

* 12 ой муддатга бир марталик мақсадли фоизсиз кредитлар бериш:

* 2019 йилдаги ўртача ойлик иш ҳақи фондининг уч бараваридан кўп бўлмаган миқдорда туроператорларга;

* ҳар бир ётоқ жой учун беш баравар миқдорида базали ҳисоблаш қиймати;

* жойлаштириш воситалари қурилиши учун берилган кредит бўйича фоиз ставкаларини (10 фоизгача) субсидиялаш, янги санитария-гигиена стандартларига мувофиқлаштириш ва айланма маблағларни тўлдириш амалга оширилади.