Ҳиндистон ва Хитой ҳарбийлари ўртасидаги тўқнашувда ўнлаб аскарлар ҳалок бўлган – ОАВ

Ҳиндистон шимолидаги Ладакх областида ҳинд ва хитой ҳарбийлари ўртасида содир бўлган тўқнашувда ўнлаб кишилар ҳалок бўлган ва жароҳатланган. Бу ҳақда ўз манбасига таяниб ANI агентлиги хабар берди.

Агентликнинг маълумотига кўра, тўқнашувда Хитой томонидан 43 киши жабрланган – бунга ҳалок бўлганлар ва оғир жароҳатланганлар ҳам киради. Ҳиндистон томонидан эса 20 киши ҳалок бўлган, жароҳатланган сони маълум қилинмаган.

Аввалроқ Ҳиндистон армияси Галван водийсида юз берган қуролли тўқнашув оқибатида Ҳиндистон томонидан бир офицер ва икки аскар ҳалок бўлгани ҳақида маълум қилганди.

Хитой ташқи ишлар вазирлиги расмий вакили Чжао Лицзянь эса "ҳинд қўшинлари ноқонуний ҳаракатлар содир этиш мақсадида чегара чизиғини икки марта кесиб ўтишгани ҳамда иғвогарона ҳаракатларни амалга ошириб, хитойлик ҳарбий хизматчиларга ҳужум уюштиргани, бу икки томон ўртасида жиддий низога сабаб бўлган"ини айтган.

Май ойи охирларида Ҳиндистон ва Хитой Ладакхдаги чегарага қатор бўлинмаларини жойлаштирганди. Бунга 5-6 май кунлари Пангонг Цо кўли ҳудудида ҳинд ва хитой ҳарбийлари ўртасидаги тўқнашув сабаб бўлганди.