Норвегияда коронавирусга қарши самарали чоралар сабабли дафн бюролари инқирозга учрамоқда  

Норвегияда дафн бюролари ўлимлар сони камайиб кетиши сабабли вужудга келган инқирозни енгиб ўтиш учун давлатдан ёрдам сўрамоқда. Мамлакатда коронавирусга қарши киритилган чоралар шунчалик самарали бўлганки, улар бошқа касалликлардан ўлим даражасига ҳам таъсир қилган.

Натижада мамлакатда жорий май ойида 2019 йил май ойидагига нисбатан 6 фоиз, июнда эса 13 фоиз одам камроқ вафот этган.

Дафн бюроларидан бирининг эгаси Эрик Ланденинг таъкидлашича, “киритилган чоралар шунчалик самарали бўлганки, улар сабабли одатдаги вақтда вафот этиб кетадиган кекса одамлар ва касалманд кишилар ҳамон яшашда давом этмоқда”. Унинг айтишича, дафн бюросининг иш ҳажми 3 мартага камайиб кетган.

Бундан ташқари, пандемия вақтида марҳумларнинг яқинлари дафн маросимларидан тобора кўпроқ воз кечмоқдалар, бу ҳам бюроларга молиявий томондан таъсир қилмоқда. Улардан баъзилари ишчилари сонини камайтиришга мажбур бўлмоқда.

Норвегияда 12 мартдан коронавирус тарқалишига қарши қатъий чоралар киритилиб, мактаблар, ресторанлар, бошқа жамоат жойлари ёпилган, спорт ва маданий тадбирлар ўтказилиши тақиқланган ва чегаралар ёпилган. Пировард натижада бу чоралар 5,4 млн.лик аҳолига эга давлатда коронавирусга 9 мингдан кўпроқ киши чалинишига олиб келган. Улардан 253 нафари вафот этган. Айни вақтда беморларнинг деярли барчаси соғайиб кетган.