Ўзбекистонга Германиядан гуманитар ёрдам ва Хитойдан тиббиёт жиҳозлари олиб келинди

Бугун, 28 июл куни, Ислом Каримов номидаги Тошкент халқаро аэропортига иккита чартер рейс келиб қўнди. Улардан бир Германиянинг Франкфурт шаҳридан бўлса, иккинчиси Хитойнинг Шанхай шаҳридан.

Франкфуртдан Ўзбекистонга амалга оширилган чартер рейс орқали Германия давлатининг Ўзбекистон халқига вирусга қарши курашишда кўмаклашиш учун тиббиёт жиҳозлари олиб келинди.

Германиядаги элчихона ташаббуси билан «Friedensdorf International» халқаро хайрия ташкилоти билан ҳамкорликда Ўзбекистоннинг тиббий ва ижтимоий муассасаларини коронавирусга қарши курашишда қўллаб-қувватлаш, шу жумладан, техноген фалокатдан азият чеккан Сирдарё вилоятига ёрдам беришга қаратилган инсонпарварлик акцияси ўтказилди.

Акция доирасида тўпланган тиббиёт жиҳозлари, ногиронлар аравачалари, дори-дармонлар, турли хил тиббиёт асбоб-ускуналари, материаллар ва ҳимоя воситаларидан иборат умумий оғирлиги 2,8 тоннадан ортиқ бўлган гуманитар юк Ўзбекистонга юборилди.

Гуманитар юк «Соғлом авлод учун» жамоат фонди номига юборилди. Фонд Ўзбекистон Республикаси Соғлиқни сақлаш вазирлиги билан келишилган ҳолда инсонпарварлик ёрдамининг тўғри тақсимланишини таъминлайди.

Иккинчи чартер рейс орқали тадбиркорларга тегишли 49 тоннага яқин яқин тиббиёт жиҳозлари, асбоб-ускуналар, комбинезон, шунингдек, кислород концентраторлари олиб келинди.

Эслатиб ўтамиз, президент Шавкат Мирзиёев раислигида 20 июль куни ўтказилган йиғилишда бош вазирга кислород концентраторлари ва пульсоксиметрларни қисқа муддатларда мамлакатга етказиш топшириғи берилгани айтилган.