АҚШнинг йирик IT-компаниялари раҳбарлари Хитой улардан технологиялар ўғирлашини рад этишди 

АҚШнинг йирик IT-компаниялари - Amazon, Apple ва Google раҳбарлари Хитой ҳукумати уларнинг компанияларидан бирор-бир технология ўғирлаган, деб ҳисобламайдилар. Улар бу ҳақида АҚШ конгресси вакиллар палатаси юридик қўмитасининг антимонопол сиёсат бўйича бўлимидаги тингловлар вақтида маълум қилишди.   

Таъкидланишича, жараёнда иштирок этган ҳар бир тадбиркордан Хитой АҚШ бизнесидан технологиялар ўғирлаши ҳақида сўралган. Apple раҳбари Тим Кук унга бундай ҳолатлар ҳақида маълум эмаслиги билан жавоб берган. Amazon раҳбари Жефф Безос ҳам бундай ҳолатларга шахсан тўқнаш келмагани ва бунга бирор мисол келтира олмаслигини айтган. 

Google директори Сундар Пичаи Хитой расмий идоралари у бошчилик қиладиган компаниядан технологиялар ўғирлагани ҳақидаги маълумотларга эга эмаслигини, бироқ 2009 йилда Google Хитойдаги шахслар томонидан киберҳужумга учраганини таъкидлаб ўтган.

Тингловларда Facebook компанияси директори Марк Цукерберг ҳам иштирок этган. У юқоридаги саволга Хитой идоралари АҚШдаги технологияларни ўғирлагани ҳақидаги маълумотлар батафсил ҳужжатлаштирилган деб ҳисоблашини айтган, бироқ бундай ҳолатлар Facebook билан юз бергани борасида аниқлик киритмаган.

Компаниялар раҳбарларидан конгресс бошқа давлатларнинг тажовузкор ҳаракатларидан ҳимояланиш учун қандай чоралар кўриши кераклиги борасида таклифлар билдириш сўралган. Бироқ тадбиркорларнинг барчаси бунга жавоб бермасликни маъқул кўрган.