Чехия бош вазири ЖССТ коронавирус бўйича тавсиялар беришдан ўзини тийиши кераклигини айтди

Аввалроқ ЖССТнинг Чехиядаги бўлими мамлакатда коронавирус юқтириш ҳолатлари ўсганлигига эътибор қаратган ва бу борада ўз тавсияларини берганди.

Андрей Бабиш / Фото: Getty Images

Чехия бош вазири Андрей Бабиш Жаҳон соғлиқни сақлаш ташкилоти коронавирус бўйича тавсиялар беришдан тийилиши кераклигини айтди.

"Ниқоб тақишни тавсия қилмаган ва пандемия бошланганини мутлақо билмаган айнан мана шу ЖССТ бўлади. У жим бўлиши керак деб ҳисоблайман", - деб ёзди Бабиш ўзининг Twitter-аккаунтида.

Чехия соғлиқни сақлаш вазири Адам Войтех бош вазирни қўллаб-қувватлаб, ЖССТнинг танқиди ноўрин эканлиги ва мамлакат ҳукумати вазиятни тўлиқ назорат қилаётганини айтди.

Чехияда охирги суткада 563та янги ҳолат аниқланган.

Коронавирус пандемияси бошланганидан буён мамлакатда 28 716 киши касалликка чалинган, 19 855 киши соғайган, 437 киши вафот этган.

Тайёрлаган Дилшод Аскаров

#Чехия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.