Озарбойжон президенти Илҳом Алиев Тоғли Қорабоғдаги вазият кескинлашиши муносабати билан мамлакатда қисман сафарбарлик бошланиши ҳақида эълон қилди. Давлат раҳбари сайтида Алиевнинг шу ҳақдаги фармойиши матни жойлаштирилган.
Фармойишга кўра, Озарбойжон сафарбарлик чақируви давлат хизмати «тасдиқланган режага мувофиқ ҳарбий хизматчилар чақирилишини таъминлаши» керак.
Ҳужжат 28 сентябрдан кучга кирган.
Аввалроқ Озарбойжоннинг барча ҳудудларида ҳарбий ҳолат жорий этилгани хабар қилинганди.
27 сентябрь куни тонгда Тоғли Қорабоғда Арманистон ва Озарбойжон ўртасида ҳарбий зиддият тикланди. Икки мамлакатда ҳам ҳарбий ҳолат эълон қилинган.
Арманистон ва Тоғли Қорабоғда ҳам умуммиллий сафарбарлик эълон қилинган.
Душанба куни ҳам ҳарбий ҳаракатлар давом этмоқда. Айни вақтда Қорабоғнинг шимолий, шимолий-шарқий ва жанубий қисмларида жанглар олиб борилмоқда.
«Интерфакс» агентлиги хабарига кўра, ҳарбий ҳолат жорий этилиши туфайли Гейдар Алиев номидаги Боку халқаро аэропорти фаолиятини вақтинча тўхтатган. Аввалроқ «Озарбойжон авиалиниялари» (Azal) авиакомпанияси Боку-Нахчиван-Боку йўналишидаги рейсларини бекор қилганди.
Бундан ташқари, Azal авиакомпанияси 1 октябрь кунги Боку-Лондон-Боку рейси ва 2 октябрь кунги Боку-Берлин-Боку рейсини ҳам бекор қилган. Шунингдек, 29 сентябрдан 4 октябргача бўлган муддатда FlyDubai, «Аэрофлот», «Белавиа» авиакомпаниялари рейслари ҳам бекор қилинган.
