ЖССТ: Ремдесивир ва гидроксихлорохин COVID-19'дан ўлим ҳолатларини камайтиришга деярли ёрдам бермайди

Коронавирусга қарши қўлланувчи бир қатор дори воситалари коронавирусдан ўлим даражасининг пасайишига таъсир қилмайди ва ўпкани сунъий шамоллатиш қурилмаларига уланган беморлар сонини камайтирмайди. Бу дорилар орасида ремдесивир ва гидроксихлорохин ҳам бор. Бу ҳақда ЖССТ маълум қилди.

“Ремдесивир, гидроксихлорохин, лопинавир ва интерферон қўлланган даволаш схемалари шифохонадаги касалларнинг ўлим даражасига деярли таъсир қилмайди”, - дейилган ЖССТ хабарида.

Бундай натижалар ЖССТнинг “Бирдамлик” (Solidarity) деб номланган тадқиқоти давомида олинган ва ҳозирча улар бўйича расмий ҳисобот ҳали эълон қилинмаган. 6 ойдан ортиқ давом этган тадқиқотда дунёнинг 30дан ортиқ давлати қатнашган, тасодифий танланишга ва плацебо эффекти назорат қилинган клиник синовларга 11 мингдан ортиқ бемор жалб этилган.

Financial Times'нинг қайд этишича, ЖССТнинг бу хулосаси коронавирусга қарши қўлланувчи ўз самарасини исботлаган ягона восита дексаметазон бўлиши мумкинлигидан дарак бермоқда.