«Янги пандемия дунёда ҳатто эртагаёқ бошланиши мумкин» — ЖССТ бош директори

Янги пандемия дунёда ҳатто «эртага» бошланиши мумкин. Унга қарши самарали кураш олиб бориш учун жаҳон мамлакатлари тегишли халқаро келишув тузиши керак. Бу ҳақда Бутунжаҳон соғлиқни сақлаш ташкилоти (ЖССТ) бош директори Тедрос Аданом Гебрейесус баёнот берди.

Фото: Reuters

«COVID-19 пандемияси ҳозирда бизга узоқда қолиб кетган, унутилган хотирадек туюлмоқда. Уни жаҳондаги можаролар, геосиёсий ва иқтисодий силкинишлар сояга солиб қўйди. Лекин кейинги пандемия шунчаки кутиб турмайди. У 20 йилдан кейин ҳам содир бўлиши мумкин, ёки ҳатто эртагаёқ юзага келиши мумкин. Биз тайёр бўлишимиз керак», — деди Тедрос Аданом Гебрейесус.

Бош директор давлатларни ЖССТнинг пандемия тўғрисидаги келишувини якунлаш жараёнига фаолроқ жалб этилишга чақирди. У таъкидлашича, агар мамлакатлар алоҳида-алоҳида ҳаракат қилса, у ҳолда глобал соғлиқни сақлаш хавфсизлигига эришишнинг иложи бўлмайди.